Ka Payakumbuah naiak oto, Painyo di malam sanayan,
Sambuiklah salam dari ambo, Untuak yang hadir di alek gadang

Assalamualaikum wr.wb

Dari sintuak kasanding baka, urang mamukek pagi pagi, dari ujuang taruih ka pangka, dari tangah sampai katapi, indak ba atok jo barompai, bukan bahinggo jo babateh, ketek indak basabuik namo, gadang indak bahimbau gala, ujuik taucap nan tapanggi nan hadir diateh rumah nangko.

Sambah kapado Bapak Kacabdin Wilayah 3 solok Raya, Bapak Kapalo dinas Parawiata Kabupaten Solok, Ibu Korwas  sekaligus Pengawas SMA N 2 Sumatera Barat, Bapak jo Ibu kapalo SMA/SMK/SMP se kabupaten Solok, Bapak Ketua Komite jo pengurus komite lainnyo, wali nagari koto gaek,  Bapak/ibu unsur pimpinan, jo majelis guru sarato tenaga kependidikan SMA N 2 sumatera Barat, sarato bapak, ibu wali murid generasi 7 yang ka kami lapeh yang hanyo bisa manyaksikan acara secaro life di rumah sajo, jo para undangan yang lah hadir pado acara kami ko

Dan Teristimiwa kapado mamak kito, bapak Muhammad Jamil, S.Ag Labai Sampono sarato bundo kaduang dari kota jo kabupeten solok, bundo kanduang dari koto gaek jo nagari Talang,terutamo anak  gadis jo anak bujang mande yang kami lapeh untuk malanjuikkan studi ka nagari urang.

Partamo dan nan paliang Utamo sakali, marilah samo-samo kito ucapkan puji sarato syukur kehadirat Allah SWT, nan alah mambarikan kito nikmat barupo kesehatan jo kesempatan, untuak bisa hadir di alek gadang kami marilahkan anak ka 7 SMA N 2 Sumatera Barat.

Nan kaduo, indak lupo-luponyo pulo basamo kito kirimkan, Sholawat sairiang salam ka Junjuangan Nabi besar kito, Nabi Muhammad SAW,

Allohumma solli ‘alaa sayyidina Muhammad, wa ‘alaa aali sayyidina Muhammad…

 

Bapak/ ibu para hadirin yang ambo muliakan, alek merilakan anak ka7 marupakan salah satu acara gebyar budaya utk malapeh anak kelas XII secara adat minang. Kalau dulu acara ko diangkek oleh pengusurus Osis, tapi kini jo untuak sataruihnyo acaro alek gadang apokah malapeh anak XII sacaro adat atau manarimo anak X sacarao adat marupakan tangung jawab pengurus Besma ( Badan Eksekutif Siswa di Asrama) SMA N 2 Sumatera Barat. Supayo anak Besma adolo sarana utk bisa maangkek event gadang sarupo anak Takmir masajid yang lah berhasil menyelenggarakan acara wisuda tahfiz untuk uda jo uninyo. Untuk itu mande ucapkan tarimo kasih ka panitia Besma sarato jo guru pembina dan tim program sekolah berbasis Budaya yang lah bakarajo kareh maangkek alek gadang sekolah wak ko.

Bapak/ibu para hadirin yang berbahagia. Sebagai sekolah unggul berasrama yang ado di Sumatera Barat, tantulah kami yang ado di siko diberi amanah yang gadang untuk mambangkit batang tarandam. Dengan melahirkan putra-putri Minang manjadi tokoh Nasional yang tanamo di saluruh nusantara sampai ka Ujuang Nagari sarupo Haji Agus Salim, Muhammad hatta, Muhammad Yamin, M Natsir  dan ndak Lupo pak Gamawan Fauzi kabanggaan kito. Baitu pulo andaknyo sarupo Jo Bundo Siti Manggopoh dari Agam, bundo Hajah Rasuna Said, Mande Rohana kudus,  Inyiak upiak Palantiang,  Syaikhah Rahmal el Yunisiah pendiri Dinniah Putri Padang Panjang.

Dari amanah tu kami cobo mawujudkan,  melalui pendekatan pembelajaran Tri logi S-M-A ( Sekolah Masjid Asrama) supayo anak -anak yang dititipkan ka kami seimbang IQ, SQ dan EQnyo. Ndak hanyo santiang jo palajaran, tapi siak alim tahu agamo, sarato manih budi bahasonyo. Manjadi kebanggaan urang tuo, kasayangan banyak urang dan tatompang banyak harapan bagi awak kasadonyo.

Dengan adonyo Kurikulum Merdeka Visi sekolahpun kami sesuaikan manjadi “Mewujudkan Profil Pelajar Pancasila yang Cerdas Berprestasi Bertalenta dan Berdaya Saing Global” dengan tetap mempertahankan motto “Belum Berhasil Tak Kembali” manjadi angan anak ka7 kami yang kami rilahan ka pai untuak malanjuikkan pandidikan supayo  manjadi urang gadang siap hadapi generasi emas di 2045.

Tauntuk Bapak, Ibu Wali Murid generasi 7 yang kami muliakan. Kami mhn maaf jiko harapan Bapak/Ibu kasodonyo ateh diri anak kami yang 126 urang alun sasuai jo harapan samulo. Dengan ASN hanyo 16 urang, fasilitas yang alun cukuik, sarato dana bantuan dari pemerintah yang masih kurang, mambuek kami agak kasusahan. Sampai kini masalah aia masih jadi kendala bagi anak kami di asrama, iyo agak payah untuk mandi pagi, karano dek cuaca hari lai dingin jadi ndak nampak bana kalaulah alun mandi. Walaupun co itu kami bapantang untuak patah arang, Alhamdulillah guru dan tanago kependidikan yang ado, santiang-santiang kasadonyo, loyal kasikolah jo peduli ka pandidikan, Bapak /Ibu komite yang taruih mamparhatikan sarato Bapak KCD jo pengawas bisa tampek kami betenggang sarato anggota dewan yang taruih manaruih maagiah bantuan. Alhamdulillah untuk tahun 2023 sekolah kami dapek bantuan pembangunan sarana air bersih dari Pak Ahmad Rius dan Sanitasi/ WC sekolah dari pak Harnalis Kobal. Terimo kasih kami haturkan.

Untuk anak mande yang 126 urang, salamo 3 tahun kito babau, tigo tahun pulo ananda dititipkan. Salamo disikolahko, kamilah mande jo abak tampek ananda bisa batenggang. Jiko ado yang kanai berang dek Abak jo Mande usahlah dimasuakkan ka dalam hati, iko samato-mato karano sayang. Kareno papatah Minang lah mangatokan  sayang ka anak dilacuiki sayang ka kampuang ditinggakan. Kok ado ta dorong kato, talonjak baso, tatikam hati dek ujuang kato, ta buruak caliak bajalan di labuah tolong dimaafkan. Laikah bisa ananda maafkan? …..Alhamdulillah, sanang jo lapang hati bana rasonyo abak jo mande rasokan.

Oi anak bujang jo anak gadih yang mande cinto

dangakanlah pasan mande ko..

Apo yang elok tolong dibao, apo yang salah tolong tinggakan. Kok dapek, kebiasaan elok yang lah tapaliharo salamoko tatap malakek sampai akhir hayat.

Jikok lah lapeh dari siko, Jan sampai kebiasaan shalat, mangaji jo hafal AlQur’an batinggakan. Karano itu paga diri dari sagalo maksiat dan tipu dayo setan. Untuk itu carilah kawan yang rajin sumbayang, acok ka masajik mampadalam Islam.

Oi anak mande dan 126. Jiko ado yang manantang badan, jaan lari tunggang langgang. Musuah  indak dicari, tapi kalau basuo pantang diilakkan. Itulah gunonya Abak Ilham maajaan silek salamo 6 bulan. Jikok tagak tagaklah di nan data. Jikok bajalan bajalanlah di nan luruih, Jikok bakato bakatolah di nan bana. Di mano aia disauak di sinan rantiang di patah, Di mano bumi dipijak disinan langik dijujuang. Nak kanduang ijan panangih. Urang panangih lakeh rabun. Urang panggamang mati jatuah. Urang parusuah lakeh tuo. Urang pamberang tangga iman

Oi anak gadih mande nan 78. Jiko awak di nagari urang, ingeklah sumbang 12. Ingek pasan ayah bundo, anak dilapeh ntuk kaja cito-cito bukan untuak pacaran. Untuak itu Paliharo diri dari rang jantan. Jaan kamari inggok, peliharolah diri jo martabat. Karano jikok mentimun jo durian disatukan, urang indak ka manyalahkan durian walaupun mentimun manjadi hancua hancuamyo. Ondeh nak kanduang, jiko itu nan tajadi idak ado malu samalu tu, antah kama malu ka disuruakan.

Ka pado mamak kami nan kami muliakan, tolong agiah pituah kabakeh anak kami yang 126.  supayo rilah hati kami malapeh anak bajalan. Supayo ndak tagaman di rantau urang, supayo bisa mambaok ijazah pulang, supayo bisa jadi contoh loh untuak adiak-adioknyo yang disikolah ko. luruih pai luruih pulang, tajago budi jo martabat, tiduanyo bakalang adat, tagaknyo batumpu undang, bajalan batungkek syarak / ugamo, hormat santun ka ibu bapak, pandai bagaua samo gadang, tapuji dek urang banyak, tapakai di mayarakat.

Oi anak mande sibiran tulang, dangakanlah pituah mamak buliah nak sanang hati abak jo mande malapeh. Alah bauriah bak sipasin, kok bakiek alah bajajak, habih tahun baganti musim sandi Adat jangan dianjak. Tabanglah satinggi langit, tapi jan lupo ka tapian. Kebahagian abak jo mande nan disiko hanyolah kerhasilan anak kanduang di maso mandatang.

Tarimo kasih jo banyak maaf wabilahi taufik wal hidayah

assalamualaikum wr.wb